شکۆداربێ ١٥ی ئاب ساڵڕۆژی راگەیاندنی رزگاری

کۆمەڵانی هەراوی خەڵکی کوردستان!

رزگاریخوازو سەربەخۆخوازان!

دۆست و لایەنگرانی حزبی رزگاری!

لە ١٥ی ئابی ئەمساڵدا بیست و یەکەمین مۆمی تەمەنی راگەیاندنی حزبی رزگاریی کوردستان دادەگیرسێنین، بەوبۆنەیەوە پیرۆزبایی لە خۆمان و سەرجەم کوردستانیان دەکەین، سڵاوی ئەمەک و وەفاداری بۆ گیانی پاکی شەهیدانی رێی رزگاری و سەربەخۆیی کوردستان دەنێرین، پەیمان دووپات دەکەینەوە و بەڵێن بە رزگاریخوازان دەدەین کە تا گەیشتن بە نیشتمانێکی سەربەخۆو کۆمەڵگەیەکی بەختەوەر تێکۆشان درێژەی دەبێ.

حزبی رزگاریی کوردستان لە ١٥-٨-١٩٩٣، بەمەبەستی درێژەدان بە کاروانی سەربەخۆخوازی یەکەمین راگەیاندنی خۆی بڵاوکردەوە، ئیدی لەو رۆژەوە تا ئێستا بەردەوام لەسەنگەری بەرگری لە خواستەکانی خەڵک تێکۆشاوە، راستوێژانە لەبەرانبەر رووداوەکاندا هەڵوێستی گرتووە، ئەو بەرنامەو پیلانانەی ریسوا کردوە کە دژ بە دۆزی رەوای گەلەکەمان وەڕێخراون، داهێنەرانە و سەردەمیانە درێژەی بە خەبات داوە، بەوهۆیەشەوە شانازیێکی گەورەی بۆ خۆی و گەلەکەی تۆمار کردووە.

ئەمڕۆ لە کاتێکدا ساڵیادی راگەیاندنی رزگاری دەکەینەوە کە باشووری کوردستان بۆ بەڕێوەبردنی هەڵبژاردنێکی دیکەی پەرلەمان ئامادەکاری دەکات، لەوپێوەندەدا خوازیارین کە هەڵبژاردن لە کاتی دیاریکراوی خۆی و لە پڕۆسەێکی پاک و بێگەردا بەڕێوەبچێ، هیواخوازین کە دەرفەتی وەکهەڤ بۆ قەوارە سیاسیەکان فەراهم بکرێ، خەڵک بتوانن ئازادانە دەنگ بە پاڵێوراوی خۆیان بدەن.

لە بۆنەی ساڵیادی راگەیاندنی رزگاریدا، جەخت لەسەر پێکهێنانی کۆنگرەی نەتەوەیی دەکەینەوە، خوازیارین کە تێکڕای هێزو رێکخراوە سیاسیەکان بەشداری تێدا بکەن، بەڵام مخابن وێڕای ئەوەی کاتێکی کەم بۆ بەڕێوەچوونی ئەو کۆنگرەیە ماوە، کەچی ژمارەیەک هێزی سیاسی لەدەرەوەی بازنەکە راگیراون و پرسیان پێناکرێ، تەنیا لە مێدیاکانەوە هەواڵی ئامادەکاری ئەو کۆنگرەیە دەزانن.

ئەمساڵ لە رەوشێکی ئاوارتەدا ساڵیادی راگەیاندنی رزگاری دەکەینەوە، ئەوەتا رۆژئاوای کوردستان دووچاری گەلەکۆمەکی هێزە شەڕخوازو دەمارگیرەکان بۆتەوە، تیرۆریستان خوێنی کوردیان حەڵاڵ کردووە، پەلاماری گوندو ئاوایی کوردان دەدەن، مرۆڤی لاشەڕ دەڕفێنن، دەست لە ژن و منداڵ ناپارێزن، بە دڕندانەترین شێوە ئەشكەنجەیان دەدەن و شەهیدیان دەکەن. بێگومان رەوشی رۆژئاوای کوردستان، شێوازێکی ترسناکی وەرگرتوە، بۆیە وادەخوازێ کە هەموو تاکێکی کوردستان پشتیوانی لە رۆژئاوا بکات، بەگوێرەی توانا کۆمەک و هاوکاریان بکات، چونکە پارێزگاریکردن لە رۆژئاواو خەڵکەکەی ئەرکێکی نەتەوەیی و نیشتمانیەو لە ئەستۆی هەموو تێکۆشەرێکی کوردستان دایە، ناکرێ بەبیانۆی جۆراوجۆرەوە تەماشای رەوشی خەمناکی رۆژئاوا بکرێ. لەو پێوەندەدا جارێکی دیکەش پشتیوانی خۆمان بۆ بزاڤی رزگاریخوازی رۆژئاوای کوردستان دووپات دەکەینەوە، هەموو ئەو هێزو دەوڵەتانەش ریسوا دەکەین کە دژ بە رۆژئاوا پیلان دەگێڕن.

ئەمساڵ کە ساڵیادی رزگاری دەکەینەوە، شاهیدی ئەو هەنگاوانەین کە بەرەو ئاشتی لە باکووری کوردستان هەڵگیراونەتەوە، پارتی کرێکارانی کوردستان و رێبەر عەبدوڵڵا ئۆجەلان ئاگربڕیان راگەیاندوە، گەریلاکانیان لە خاکی ئەو وڵاتە کێشاوەتەوە، جیهانییان دەستخۆشیان لەو هەنگاوانە کردووە، ئیدی نۆرەی ئەردۆگان و حکومەتی ئەنکارایە لە واری کرداریدا هەنگاو بهاوێژن، ئێمە پێشتریش پیرۆزباییمان لەو هەنگاوانە کردووەو پشتیوانیمان لێکردوون، ئەمڕۆ لە ساڵیادی رزگاریدا پشتیوانی خۆمان دووپات دەکەینەوە، خوازیارین پڕۆسەی ئاشتی سەربکەوێ، کۆتایی بە شەڕی خوێناوی بهێنرێ، تورکیا دان بەمافی رەوای گەلی باکووری کوردستان بنێ و دەست لە داگیرکاری هەڵبگرێ. لەلایەکی دیکەشەوە دوای دەستبەکاربوونی حەسەن رۆحانی وەک سەرکۆماری نوێی کۆماری ئیسلامی ئیران، کۆمەڵگەی نێودەوڵەتی چاوەڕێیە کە سەرکۆماری نوێ هەنگاوی کرانەوە بەرووی جیهان هەڵبگرێتەوە، کێشەو گرفتەکانی وڵاتەکەی یەکلایی بکاتەوە، رۆژهەڵاتی کوردستانیش خوازیارە کە سیاسەتی هاوێرکاری و ناحەزی کۆتا بکرێ، کوردستانیان بە زمانی دایک لە فێرگەو زانکۆکاندا بخوێنن، ئیدارەکان فەرمیبوونی زمانی کوردی پەسند بکەن، هەروەها نەتەوەی کوردیش لە رۆژهەڵات وەک باقی نەتەوەکانی دیکەی ئێران ماف و ئازادیەکانی بۆ بگەڕێتەوە، بەوهۆیەشەوە ئاشتی و ئارامی وەدی دێ؛ هەروەها خوازیارین کە هێزە سیاسیەکانی رۆژهەڵاتی کوردستان ئاشتەوایی نێوەخۆیان مسۆگەر بکەن، یەکگرتووانە خۆیان بۆ ئەگەرو پێشهاتەکان ئامادە بکەن.

ئەمساڵ کە ساڵڕۆژی راگەیاندنی رزگاری دەکەینەوە، بە گەشبینیەوە لە ئاسۆی داهاتوو دەڕوانین، هەم حكومەتی هەرێم پێگەی خۆی قایم و بەهێزتر کردووە، هەمیش کێشەی رەوای گەلی کوردستان هەنگاوی بەجیهانیبوونی هەڵگرتۆتەوە، دۆست و هاوسۆزی زیاتری بۆ پەیدابووە، بەوهۆیەوە بە یەکڕێزی پەلەکانی بزاڤی رزگاریخوازی و بە پێکهێنانی کۆنگرەی نەتەوەیی رێی گەیشتن بە ئاواتەکان کورتتر دەبێتەوە.

شکۆدار بێ ١٥ی ئاب، ساڵڕۆژی راگەیاندنی رزگاری.

سەرکەوتوو بێ خەبات لە پێناو کوردستانێکی سەربەخۆو گەلێکی بەختیاردا.

هەولێر مەکتەبی سیاسی

١٥-٨-٢٠١٣ حزبی رزگاریی کوردستان